La música d’anguaño n’Asturies, tanto en castellán como n’asturianu, ye una preba evidente de la llucha escontra los elementos. Nun me presta ximelgar la bandera del vieyu revieyu que namás sabe mirar p’atrás, que piensa que too yera meyor cuando ún yera mozu, pero nun ye mentira que nesta rexón la cultura sobrevive de milagru y pol enfotu de la mocedá y malapenes de les instituciones.

Toos sabemos que la cultura ye lo primero que pierde sofitu nuna sociedá castigada per crisis de dellos collores y duraciones. Y sabemos tamién que la xente, sobremanera en malos tiempos, ye más de gastar les perres nel conciertu de Springsteen de cada década  que nun conciertu de tonada-jazz. Pero, con too y con eso, la situación d’esti momentu nel nuesu sector ye digna, a lo menos, d’un artículu d’opinión. Nesti vamos falar namás de la música cantada en llingua asturiana, poniendo’l güeyu nos grupos o solistes con grabaciones editaes ente 2016 y 2019, y nes qu’haiga un mínimu de cinco canciones cantaes -entiéndase que nun estudiamos la música instrumental-. Pido perdón, d’entamu, poles ausencies, que son involuntaries y prometo correxir si hai ocasión

Vamos falar , lo primero, del folk clásicu, que representaben grupos como Felpeyu, Llan de Cubel, Corquiéu o Tejedor y que foi la corriente más viva nos compases finales del sieglu XX. Pesie  a la bayura de propuestes qu’hebo ente los años 1998-2008,  esti estilu nun tien un heriedu mui claru. Mesmo porque munchos d’estos grupos siguen n’activo y ocupen esi espaciu, mesmo pela ruptura de la burbuya de les «nueches celtas» (de la que falaremos n’otra ocasión) o dafechu pela merma nes subvenciones del Principáu d’Asturies, pero’l casu ye que, anque a finales del sieglu XX yeren abondes les propuestes d’esti tipu, agora ye más difícil atopar grupos que faigan y editen música con regularidá. Buscando grupos con referencies en LP espublizaes nel marcu temporal d’esti artículu, namás m’alcuentro col discu de D’Urria (un trabayu cantáu en patxuezo, una variante llingüística del asturlliones occidental)y col de Los Dalton, anque esti trátase d’un trabayu ensin cantares orixinales. Hai dellos grupos qu’amosaron un EP nesti tiempu (¿Aú?, Mur…) y otros que tan en procesu de finalización de prósimos trabayos, pero llama la atención que, nesta fastera de la música asturiana, los trabayos discográficos s’editen con una lentitú que nun s’aprecia n’otros casos y que nos fai pensar, otra vuelta, na menor cantidá de subvenciones y na baxada espectacular d’actividá nel circuitu.

Un casu que merez especial atención, tanto polo novedoso de la propuesta como pol ésitu que tan coyechando, ye’l dúu L-R, formáu por Rubén Bada y Leticia Baselgas. Partiendo de los parámetros de la canción tradicional de pandereta, cola inclusión d’arranchos de guitarra elléctrica y programaciones, ufierten un trabayu con un pie na modernidá y otru na hestoria, que dio llugar a la etiqueta de post-folk.

Dientro del mundu de la percusión y les canciones tradicionales cantaes nun podemos escaecer al colectivu Muyeres, qu’editó en 2018 el discu «País Malva».

Nel tradicional mundu de la tonada, más vivu que nunca y con programa televisivu con altos porcentaxes d’audiencia, vamos destacar -namás pol fechu de ser renovadores d’un xéneru qu’apuesta abondo pola pureza- al cantautor Ún de grao o a Antón Mechaca. Entrambos xunten la tonada cola guitarra (clásica nel primer casu y elléctrica nel segundu) y tan afitaos ensembre nel panorama de la música en directu del país. Tamién vamos incluyir equí a Héctor Braga, qu’anque nun tien trabayu editáu n’asturianu dende 2015, ye una voz que nun pue quedar fuera d’esta reflexón.

Dos de les voces más moces y punteres de la tonada del sieglu XX y de la primer década del XXI son, güei, dos propuestes estremaes y innovadores que, saliendo del ñeru de la canción tradicional, tan esperimentando con proyectos ambiciosos y granibles. Falo, en primer llugar, d’Anabel Santiago y, en segundu llugar -por cronoloxía de espublizaciones- de Marisa Valle Roso. Anabel ta acabante editar un discu d’elléctronica  («Y andá») y Marisa un caleidoscopiu sonoru nos dos idiomes d’Asturies que se titula «Consciente».

El tarrén del rock, coles sos múltiples fasteres, ye ún de los más destacaos en cuantes qu’a númberu y calidá de bandes. Tenemos dende los míticos Dixebra, rompiendo escenarios dende los años ochenta, hasta los más mozos Misiva, pasando pol glam de Bacotexo, el ska-punk de Skama la Rede, el folk metal de Taranus, el metal sinfónicu de Last Days Of Eden, el crust punk de Buoi Muortu, les canciones de raigañu xamaicanu de La Tarrancha o los enérxicos Skontra  Ochobre  Ensin olvidar a los inventores del agro-rock, Los Berrones, qu’acaben e’espublizar el primer discu en nueve años o a Melandru, un conxuntu bien mozu que bien podría tar faciendo la banda sonora de los paisaxes del Marte asturianu. Tamién nos queden fuera del espaciu de tiempu analizáu Spanta la Xente, que nun graben dende 2015 pero tienen un proyectu estremau de los anteriores que paga la pena nomar.

En cuantes qu’a la música cercana a la «canción d’autor», hai que dicir que ye un xéneru non mui frecuentáu polos músicos de la rexón, onde hai que falar obligatoriamente de Toli Morilla, que marcó una pauta cola espublización en 2003 del discu de poemes musicaos «Nueche d’insomniu» y del tinetense Rafa Lorenzo, dambos en plena forma y entamadores d’esti estilu n’Asturies cabera (col permisu, siempres de Xulio Ramos, que tamién ta trabayando material nuevo). Esa sienda siguióla’l que escribe y podemos incluyir nella a la intérprete Silvia Quesada, a Fernando Valle Roso, Luis Nuñez o al escritor Xaime Martínez, que ta acabante de sacar un álbum únicu nel panorama musical d’equí.

Nel penúltimu puestu, non por orden de llegada sinón polo que tienen de importancia pa los años que van venir, tengo que falar de dos grupos de música infantil (anque siempres seya tontería xeneralizar con unes canciones que son pa tolos públicos): el primeru ye Pop Piquiñín, qu’acumulen un ritmu envidiable d’espublización y una carrada de fans que ya quixeren munchos, y’l segundu ye A Comuna del Barruzo, que tan acabantes de llegar pero vienen pa quedase y que son los primeros n’editar un discu-llibru en fala.

Dexamos pal final al músicu asturianu que, de xuru, ocupó más portaes y cabeceres nos últimos años, que nun ye otru que Rodrigo Cuevas, una suerte de cupletista new wave con madreñes que nun dexa indiferente a naide y que ta poniendo la canción asturiana nes ondes de Radio 3, lo que nun ye cosa pequeña. Como se ve n’esti amagu d’artículu y pesie al pesimismu de les primeres llínies, la música n’asturianu n’esti 2019 tien una salú meyor que la de munches otres rexones. Tamién ye perimportante’l fechu de que tenemos l’asturianu mui vivu en munchos estilos que va venti o trenta años yeren territoriu absolutu del castellán o l’inglés. Agora quédanos naguar por un meyor sofitu de les instituciones y por una meyora demográfica, qu’al pasu que vamos les xires van ser nos Hogares del Pensionista. Hai soníos, hai canciones, agora falta qu’haiga futuru.